MAUNGUDZO: EMUNYORI

Wednesday 7 January 2015

Written: 2015 ( Magutabwe [1] )

Start: 01:17

End:    02:23  

MAUNGUDZO: EMUNYORI

Hama dzangu…uyu wamunoona… ari apa uyu,

Munyori!

Munyori… ndosaka ari,

Murombo!

Iye anoti zvaanonyora…

Zvinomunakidza!

Asi iye anoti zvakare…anoshaya

Vanozviverenga!

Vashoma vanozviverenga anoti…

Vashomanana!

Vadhindi vezvinyorwa…anoti vane zvavowo,

Zvavanodhinda!

Ko hurombo hwako hunobva pai…

Shamwari?

Iwo angu aya maoko aya…

Asingagone nekuda kutsvara pasi!

Idzo dzangu pfungwa idzi…

Dzisingagone nekumhanya-mhanya!

Iwo angu maziso aya…

Asingagone, nekutsvaga- tsvaga mamiriro ezvinhu!

Iwo mwoyo wangu uyu…

Une chidokwadokwa chemafaro!

Naivo vashoma…

Vanomapembedza angu manyawi aya!

Dai ndiri shiri ndaibhururuka…

Muimbi akaimba!

Dai ndiri pfungwa…

Ndaitamba nedzimwe pfungwa!

Ndai ndiri mwoyo…

Ndaizvitova wose wangu muviri nerunyararo!

Dai ndiri ruoko…

Ndairadanukira kudhinda ose mashisha!

Gwishu- kugurwa!

Mumwe ndokubva ati “Dai kufunga kwebenzi”

Ehe! Kufunga kwebenzi- ndosaka tichinzi tinopenga!

Kupenga?- Ehe kupenga!

Zvino zvandiri munhu…chandinoshota chii?

Ndikabata apa ndosekwa…

Ndikabata apa ndonzwirwa tsitsi…

Ndikabata apa vodzima wangu moto…

Ndikabata apa vondifuridza sakarara…

Ndikabata apa vonditsikirira angu mapendekete, kunge chavo chikorobho…

Ndikabata apa vonditarisa neavo maziso anoba kutenda…

Ndikabata apa vondidimbura rurimi…

Hanzi unotiendera mberi semuswe wedzvinyu!

Saka pangu chaipo ndepapi?

Handiti angu mashoko…kuzarura dzenyu nzeve!

Handiti angu mashoko…kuvhura enyu maziso!

Saka pandinokupingirishai munzwisiso ndepapi?

Sei munyori ari murombo ndiwo mubvunzo wangu?

Hanzi nemumwe, ‘Vanhu havachaverenge!’

Havachaverenge? Vakudini?

Kusaverenga, usina kumboverenga?

Zvinorevei izvozvo?

Hanzi ‘Havachatenge mabhukusi’

Kusatenga mabhukusi?

Zvinorevei izvozvo?

Saka vakutenga chii…

Uye  vakatanga kutenga zvinhu izvozvo kubva rinhi?

Ndiye nharo, ngwiro…makwiro chaiwo….!

Mukaramba muine nharo dzenyu idzodzo,

Dzekusapa munyori mari yake…

Nhamo yacho muchaiwona!

Unoti zvawakadzidza ndizvo zvose?

Vakadzidza vacharamba vachingodzidza,

Nekudzidzisa vavanoda!

Vasina kudzidza vacharamba,

Vachingoti mbeveve- vachitevera miswe dzembeva!

Avo vanetwushungu ndivo vacharamba vachingodzidzisana,

Kusvika vane twuzwi twunonzwikwa nevana vevakadzidza!

Hamusati mazvinzwa kuti mufudzi wemweya,

Yake mari- akupihwa?

Asi hamusati mazvinzwa?

Asi hamusati mazvinzwa kuti, akatondinamatirawo kuti yangu iwuye?

Kusvika mapa munyori mari yake!

Kusvika mapa munyori mari yake!

Kusvika mapa munyori mari yake,

Muchaifamba yenyu nzira yamunoziva…

Inokusiyayi kumachena muchiisiya pachena!

Ndipe mari yangu iwe- ndipe!

Ndipe mari yangu iwe- ndipe!

Ndikupewo iwe- rwako ruzivo…

Ugopewo vose vaunoda!

Zvichida…dzangu pfungwa idzi dzingafare

Zvichida…rwangu ruoko urwu rwungasununguke

Zvichida…wangu mwoyo uyu ungapembere!

Kusununguka kwembereko, ,mwana achisvetukira pamubhedha!

Zvichita…ako meso angaone zvakare

Zvichida…dzako pfungwa dzingasunungurwe kubva pajoko rehurombo

Zvichida… ungadzimure moto uyu wosvosvera kupisa chako chiropa

Zvichida…hwako hupenyu hutsva hungavhenekere mapazi ose ohupenyu hwako!

Kusatenda kwehosikito, kuona munhu achifara!

Iye achafara achafara…iye achagara mumafuro manyoro,

Akazvigarira hake…achimurumbidza wake musiki- Muridzi wezvipo!

MAGUMO!!!

HWANGU-HUROVHA

Sunday 6 January 2015

Written: 2008 ( Nzarabwe [25] )

Start: 04:21

End:    5:23    

HWANGU- HUROVHA

Hwangu hurovha!

Hwangu hurovha,

Hwakandihwandira sembada,

Ndakarivara zvangu pamusoro paro,

Dapurahunanzva rehupenyu!

Hwangu hurovha…hwakandionesa,

Magaro enyoka shuwa,

Chisionekwe nyanga dzemuti wemudhorofiya chete!

Hukandiratidza denderedzwa rehupenyu,

Rwusina ani nani zvake anokwanisa kurishandura!

Kana kamutsetsepa ndakamushaiwa!

Hukandiratidza zve kukosha kwenguva,

Dikita-rute nemweya waTenzi!

Hukandiratidza kukosha kweumwe nemumwe,

Anoonekwa nerutyeve rwaro ziso!

Haiwa- hwangu hurovha,

Hwaiva hwechishuwo,

Chekuchema sebere kurumwa nesvosve,

Iro rakaruma chidya chenhoro chaicho!

Nokuti kuritarisira ndiko

Kwandakanga ndakariita iro zuva,

Randaizobvisa iro bhachi rohurovha,

Rakanga radai kundinamatira,

Sezvinonzi inhengo yemuviri wangu!

Kuti ndewangu ndega?

Kuti takahuona tese here?

Kuti ndizvo zvinoonekwa nerovha rese?

Kuti hwangu hurovha hwainge uri nani?

Kuti hwanga hwakanyanyisa kukunda hwevamwe?

Kuti vanhu vakanyatsozviona zvaiitika?

Kuti vakanyatsozvinzwisisa zvandainzwa mumoyo mangu?

A-aaa, anoziva ndiyani kana iwe uchiti hauzive?

Ndipo pandingazivewo here chinhu,

Ini ndiriwo betesango akatsikirirwa,

Nairo dumbu raChangamire Dombo Masvingo?

Asi chandinoziva chete ndechekuti,

Hwangu hurovha hwaiva bindupindu,

Mabhachi abetesango chaiwo!

Ndekupi kwawakamboona mukuwasha,

Kurara akashama muimba imwechete naa’mbuya?

Asi a’mbuya vachisekedzana naye chikwe-e,

Pasina chipi kana chipi chingaitike?

Ndekupi kwawakamboona muyenzi,

Achimwa tsvutugadzike asina bhurugwa,

Vashanyirwi vachitoshuwira kuti dai anamata,

Pasina kurohwa nehana, kushamiswa kana kunyara?

Ndekupi kwawakamboonawo munhu,

Achipindawo musvondo akashama,

Akangopfeka kashati, nguwo yemukati chete,

Asi achisvikotora mwana wevanhu moyo?

Ndekupi kwawakamboona munhu,

achipinda mudhorobha akapfeka kabudura,

Nemudzipanyota chete, kunge kunyepa,

Asi achitozopinda mumahofisi kutsvaga basa?

Sekusaitika kwazvo, ndiko kwakava kuitika kwazvo!

Uhwu hukava hurovha hwangu,

Hukazivikanwa neni nemoyo wangu,

Vekure vakashaya kana nechimwe chavakaona!

Ndaizoriwana here basa randaida?

Ndaizomuwana here musikana uya wandaida?

Ndaizokwanisa here kuitenga motokari iya yandaida?

Ndaizokwanisa here kuuzvambura mucheno wandaida?

Ndaizokwanisa here kuimisa yanguwo imba?

Ndaizokwanisawo here kutenga ako neako kekuendesa kumusha?

Ndaizokwanisawo here kuita munhu ane chiremerera paruzhinji?

Yese iyi yaiva mibvunzo yaitenderedza,

Wangu musoro kuita chikochikari chamadhongi chaicho!

Chokwadi hwangu hurovha hwaiva hutsi kubuda,

Kuri kukweshana kwedzangu pfungwa,

Pane ramangwana randaisaziva kuti rakamira sei!

Asi chinombonyatsonzi rovha chii?

Munhu apfuura makore ekuriritirwa

Asingaende kubasa uye asingakwanise kuzviriritira?

Apfuura makore ekuriritirwa? Kubva marohva akawanda!

Kuti asingaende kubasa? Kubva marovha akawandisa!

Kuti asingakwanise kuzviriritira? Kubva a-aah medu munyika azere marovha!

Ko kana hwahurovha chinenge chava chii manje?

Kutadza kupfuura makore ekuriritirwa?

Kusaenda kwemunhu kubasa?

Kutadza kuzviriritira?

Ko iye munhu anozotadza kupfuura makore ekuriritirwa sei?

Ko iye munhu anozotadza kuenda kubasa sei?

Kana iko kutadza kuzviriritira sei?

Ko munhu akatadza kupfuura makore ekuriritirwa,

Otadza kuenda kubasa sevamwe,

Otadza kuzviriritira sevamwe,

Anganzi haasi munhu pavanhu here?

Kubva kana zvakadaro ndaiva mufi pavapenyu,

Chokwadi hurovha hwangu hwaiva hwemufi pavapenyu chaihwo!

Ndikati nditange kutaura zvinonzi ‘Chinzwai atanga!’

Asi unoti kwangu kuri kuda kunyepa kani?

Ndikati ndivaratidze zvaiitika zvonzi ‘A-aa hona manje’

Unoti ndingavaratidze nyanga dzabetesango here?

Ndikati ndivanwise aiva angu marwadzo zvonzi ‘Hona- hona dzatanga’

Saka unoti ndingaridze hosho ngoma dziripo?

Ndikati ndinzwireiwo hwaiva hurovha hwangu zvonzi ‘Haumuzive here uyo’

Asi unoti hwangu huri hutsinye kusvina mota ichangobuda?

Hwngu hurovha ndakauona neangu meso!

Ndikaunzwa nedzangu nzeve!

Ndikahufemhedza nedzangu mhino!

Ndikazouraira nerangu rurimi!

Ndikazounzwa uchinamatira parangu ganda!

Chokwadi hwangu hurovha,

Hwakandiita mutorwa muhwangu hupenyu,

Hukandishaisa wangu mudiwa Chipo wandaida

Hukandisiya ndavachikomana chapajecha chaicho!

Kutaura nezvinhu zvisingafeme…vanaDhayari,

Hukandisiya ndisina kana changu kunze kwerangu bvudzi,

Rakazviona zvese zvichiitika,

Kuti ndigokura ndakangwarira!

Asi vakuru havanyepe shuwa,

Chisingapere chinoshura maviri kunge katatu!

MAGUMO!!!  

BVUDZI- WANGU MWANA WANDINOFARIRA

Sunday 4 January 2015

Written: 2008 ( Nzarabwe [24] )

Start: 04:21

End:    5:23    

BVUDZI- WANGU MWANA WANDINOFARIRA

Bvudzi wangu mwana wandinoda,

Wangu mwana wandinogara naye!

Kubuda kwaro zuva,

Ndiko kumushongedza kwangu- mwana!

Kana kuri kugeza- hatisiyane,

Mumwe pamberi- mumwe kumashure,

Mudungwe kunogeza- nemwana!

Kupi kwandinoenda ndichimusiya?

Papi pacho pandinozofamba,

SaZano Ndega, akapisa jira mumasese?

Tinototi tifambe tose setsvarapasi,

Dzehuku imwe- newangu mwana wandinoda!

Kusvika iro zuva rake rekuyaruka…

Wangu mwana wandinoda,

Wangu mwana wandakazvitsvagira ndega,

Murino gore rakadai- rino renzara kudai!

Zvipiko…vana Gwarazimba Gorah?

Haisiriyo here ngomwa iya iyi?

Haasiriye here uya wekusvotora vana,

Nenyaya yekukara humhandara?

Haasiyiye here uya wekuchengeta,

Wake mwana- aisaadiwa nechero munhu?

Haasiriye here uya wekumbopisa mwana,

Nezvipisa- pisa kusvika atozopisawo rake dehenya?

Haasiriye here uya wekutsvinyira vana vevamwe,

Achiti ‘hona kamwana ako kakaondoroka ako’

Haasiriye here uya aizobereka chidhori,

Achinyepera kuti ndewake mwana?

Ko chivhindikiti chemwana ichi,

Akazochiwana kupiko Gwarazimba Gorah?

Bvunza hako Zandembe mpfana waZidi!

Haasiriye here mpfanha aigara nemazuda,

Murake tsigo nedengwete redehenya?

Haasiriye here aingoti gare- gare,

Dimbure bvudzi rake kunge rinoruma?

Haasiriye here wekusachengetedza rake bvudzi,

Richinge dungetunge musoro wefeso?

Haasiriye here uya aizviita mu ‘hard’

Ku’pemana’ nebvudzi semunhu wechikadzi?

Haasiriye here uya wekunyomba vamwe,

Achiti ‘Hona twurasta twaLanzi twakaondoroka’

Haasiriye here uya aizorukwa nema ‘extensions’

Achida kukwana kwana muzvirongwa?

Zvino bvudzi rakusvika mumagadziko iri,

Azenge ariwana rinhi Gwarazimba Gorah?

Bvunzaiwo henyu baba Ginah!

Asi nemiwo baba Ginah,

Chokwadi munhu angaite bvudzi mwana wake?

Hakusi kupenga kune kupengesana mukati here ikoko?

Hazvina kumbosiyana nekuti ‘bhoki ndicousin wangu’

Kana kurovera Jongwe gusvu uchiti,

‘Mamukasei sekuru Joe-ngwe?’

Ukati munhu uyu anoziva chinonzi mwana here,

Kana kuti anoita fembera- fembera kufamba kwenhuta?

Kuti raitaura bvudzi racho,

Unoti raipabvumawo here kuita mwana waGorah?

Chokwadi zvimwe zvipfuyo zvinovhunirwa,

Musoro kuseri kwezvigwenzi zvakarivara shuwa!

Chokwadi kusaziva kufa veduwepe,

Dai vaRuzivo vaidzidzisa zvimwe,

Vangadai vakamudzidzisawo mpfanha uyu,

Musiyano uripo pakati pebvudzi nemwana!

Taurai henyu General- idama chairo iroro!

Hanzi ‘Bvudzi wangu mwana wandinoda’

Bvudzi nemunhu zvakazoita hukama rinhi?

Tomboti uripo- saka amai vacho ndiani?

Makatarisawo dehenya ringaitewo mai- pakai?

Ini handisati ndamborinzwa bvudzi,

Richichemera chihwitsi kana nezuva rimwe!

Ini handisati ndamborizwa bvudzi,

Richichemera bhutsu dzekuchikoro kana kamwe!

Kana iro bvudzi kuridza ngonono,

Kana nerimwe zuva randakambozvinzwa!

Asi kuti ibvudzi chikwambo kani,

Tionekwe tese kutiza pano tichimhanya!

Nokuti zvamazuva ano hanzi,

‘Taura zvichinge zvakupotsa,

Zvichiri mujinga zvinokumedza!’

Ayewa vatete chimbondipaiwo mvura ndimbomwire,

Pamwe tinganzwisisane pane nyaya iri pano iyi!

[Tauraiwo neni] Ndepapi pandinoroora nemamiriro akaita zvinhu?

Handiti kuroora kuzvitema nyora muziso chaiko?

Ko ivo vana vacho ndovapei?

Ini ndiri muswe wedzvinyu chaiwo,

Unokwanisa kugurwa ipi zvayo nguva!

Saka munoti kwangu kuri kusamuda mwana?

Hazvisi zvirinani kushambira  pamusoro pedanda,

Pane kushambira pamusoro petambo chaiyo?

Zvangazvakaipei kuchengeta changu chisikwa,

Chandinokwanisa kuchengeta sewangu mwana,

Zvekuti kunyangwe ndikafa nhasi,

Ndingasiyewo chicherechedzo panyika!

Zvekuti dai raitaura bvudzi rangu,

Handiti raitozosara richikunyaradzai parwangu rufu…

Richitokuudzai zvimwe zvamaisaziva pamusoro pangu!

Mungati ndirikupunyairira pasina here?

Ko zvazvinonzi apunyaira haashaye musodzi,

Wangu musodzi uri pamatama hamuuoni?

‘Ndiye wangu mwana wandinoda,

Wangu mwana wandinogara naye,

Kubuda kwaro zuva,

Ndiko kumushongedza kwangu mwana…’

Aiwa…kure kwegava ndokusina mutsubvu- Gwarazimba Gorah

Kare haagare ari kare shuwa- Zandembe

Aiwa aiva madziva ava mazambuko- Baba Ginah

Ukuwo ndiko kushamisa kwebere kukwesha mazino nedhorofiya- General

Zvamazuva ano ndezvamazuva ano

Ano mazuva , zuva rimwe harireve zvizhinji- Vatete!

MAGUMO!!!

DEAD MEN TALKING

Sunday 4 January 2015

Written: 2015 (My African Mental Physics [10] )

Start: 17:20

End:  18:11

DEAD MEN TALKING

I hear they are being killed…

Killed for what they do not know!

‘Do you really know why you were killed?’

Asked he asked, the dead person.

Would they have received the answer?

Culture, tradition and customs destroyed!

Would they be the ones who destroyed it?

I doubt about that…

Maybe systematization blind folded their eyes to vanity.

Them to blame… ‘no no no…

Not even a single day!’ He would say…

Africa can you hear some new voices…

From your gatherings and the ground?

‘No no no… we can’t’

Why not…?

‘We are busy crying and burying our relatives,

Who died from an unknown disease!’

Can you please cry with us…

‘How can we cry- more whilst we are still crying?’

What are our ancestors saying about these things?

‘We no longer hear the voices of our ancestors…

The politicians domesticated all the culture!’

So Mr author…are you not afraid of them?

‘I am one of them, that is the reason why I am writing this poem!’

A politician? ‘Yes a politician!’

 ‘Who dears to kill, before being killed?

Is this war?

Who is fighting who?

And… since when?

Was it foreseen or a surprise?’

Asked the dead man to another dead man new arrival!

‘Has dying become the new fashion of life?’

Asked the dead man questioner!

If the dead would fight with the living what would remain?

‘Dead people!’ Answered all the dead people.

What is it that we did to deserve this- our ancestors in West Africa?

What is it that we did to deserve this- our ancestors tattered all over the world?

What is it?

What is it?

What is it that we have done?

‘I do not believe in that!’

Said one living being of the deceased,

What do you believe in, the author asked?

‘More life!’

A-ha more life…

An act of tranquility between the beginning and the end!

Why would a living being leave to live?

Situations crossing people’s boundaries,

Without leaving room for them to vote!

‘What is it that I am allowed to vote for in this world?

 Even my prayers, not all of them are answered, as I recall’

Echoed an old man sitting on a bench of the living!

Situations, the greatest enemy against my people’s wishes!

This is my intellectual clap!

One clap is a sign of the war…

Two blows are symptoms of war…

A kickback is the beginning of the war…

Bloodshed marks the end of the war…

And Death echoes peace and tranquility to all human vibrations!

That, to which we are forced to believe…

That, to which we have fallen victims of!

Arise man for the son…

Arise woman for the girl…

To face the true truth…

And make today the future- a better history!

It is all in the inner fire,

And it is all just a step from your consciousness.

A jackal living to bite its tail…

To a jackal pack living from surviving to living!

‘Iron bars removed from our necks,

But financial bars put on our necks!’   

Said the poor street boy sitting on the edge of his intellectual clap…

Too big for him to shut up from these situational devils!

THE END!!!

NDAKUSUWA MUDIWA NDAKUSUWISISA

Sunday 4 January 2015

Written: 2008 ( Nzarabwe [16] )

Start: 00:41

End:    1:38    

NDAKUSUWA MUDIWA NDAKUSUWISISA

Shuwa here waenda mudiwa?

Handina kumbobvira ndazvifunga,

Kuti nerimwe zuva dzvinyu achadambura muswe zvakadai!

Zvandasara ndangotamba- tamba, ndiri muswe wako

Iwe dzvinyu rangu waenda?

Ndichapora here chironda changu,

Ichi…chazara munyu wematombo mumarwadzo?

Hamheno! Ndinongomirira iro zuva

Chiedza chako chichavheneka chiso changu…

Apo ndichaputirwa nemufaro wegudo,

Kuita muzerere nemuswe makumbo ari mudenga!

Chidembo chawakandisiira chinondipfungaidzira,

Mweya rega rega zuva mufunge!

Ndakashaya kana nembwa kana saga,

Rekuchipfuudza ichi chidembo,

Chadai kutadzisamoyo wangu kufema!

Chapwititi chehasha kumeso nemoyo,

Apo ndinokusiya zvishoma nezvishoma mudzangu hope!

Izvi zvinondikanga chiropa ndiripo mufunge!

Apo ndinomedzwa nechiedza chasekuru Zuva.

Kudoedza kudzoka kuhope handikuone,

Chako chiso chamedzwa naMambo Hope!

Aiwamudiwa ndakusuwa…kukusuwisisa.

Kubuda mumachira kunenge kunamwa neurimbo,

Kuri kudzoserwa mumachira nendangariro dzako…

Kutatamuka hakuperi kuri kuyeuka rako,

Dindindi riri pamusoro pedzviti rangu.

Kufamba kuchinge kwakamba,

Kuri kuputirwa nechapupu chekusaziva.

Ndinombotiza dzimwe nguva,

Pandinoona chako chiso chakanditarisa,

Mukubvisa mabori mangwanani!

Ndinopedza gore ndirimo muchimbuzi,

Pasina zvinenge zvichifungwa,

Kunze kwekuzama kurangarira chako chiso!

Mudiwa ndakusuwa kukusuwisisa mufunge…

Shiri dzandinonzwa muswere wezuva,

Dzinongoimba kambo kedu kaye kerudo!

Kudya handichakwanise kana,

Chikafu chapera nezvipoka- poka zvenhunzi,

Zvese izvi hazvioneki, pfungwa dziri kwauri chete!

Kunyangwe nehumhutu chaiwo hauchandirume madeko,

Nekuonawo kusiririsa kwangu.

Ndofunga rangu ropa harichanake kana kugwamba chaiko!

Vanondiona havachandinzwisise!

Kupenga, kunyara, kutambudzwa, kutsvinya- hamheno ikoko!

Asi ini hangu ndinoriziva rawakandiisa joki,

Roupenyu chairo, risina mukare akamboona.

Mangu mumusoro manechigayo chikuru,

Chapedza kumedza zvose zvirimo,

Nekungosiya iwewe chete imomo…

Mudiwa ini hangu ndakusuwa, kukusuwisisa mufunge!

Rega- rega raMwari ndinofunga zuva rawakandisiya

Rwaiva rufaro rwaiva mumaziso,

Rwakatsikirira kusuwa pasi parwo!

Kutaura taitaura hedu, asi kwaiva kuchema kwemoyo!

Huku nezvimwiwa takadya nekumwa zvedu,

Anoziva ndidumbu, apo moyo nenjere zvaisavapo!

Kukutarisa kwaindikwenyera kuchema,

Ako maoko muhuro ainge matanda emoto,

Kunditsikirira nekundirangaridza kuchema.

Hongu vakanaka vasikana vakauya,

Asi vose vakamedzwa nerunako rwako,

Runonyaradza kunyangwe mwana agere pachuru chamasvosve!

Uku hakusi kunyepa kwete,

Asi ndaiona iwe chete mumaziso angu!

Kufamba kwenguva kwaiva kuswebera pedyo nepfumo rehupenyu.

Kutakura kwandakaita mabhegi nemapasuru,

Kwakava kutakurwawo kwerwangu rudo newe!

Kumedzwa kwakaitwa bhazi,

Kwakavawo kumedzwa kuhurume hwangu…

Pachose ndasara, ndarema chairo…

Mudiwa wangu aiwa ini ndakusuwa kukusuwisisa!

Iko zvino ndangosara ndavaMusvetwanemba,

Mushaikwapavazhinji, Muridziwechimbudzi, Muridziwadzohope,

Musazivavamwevose, Chiremaparudo, Mukwenyiwemusoro

Uye Mubatiweshayanematama!

Ndichirangarira nguva yataiva tose,

Misodzi isati yava pamatama,

Rufaro ruchiva zuva redu.

Ndichikuudza twunyambo  twangu tweubenzi,

Ndichikutambira zvinyadzi,

Uchindifuridza twupuka muangu maziso,

Nekundisvina twumapundu twangu,

Uchindipamhadza nechikafu uyo mutupo wangu.

Uku kwaiva kudanana…kudanana chaiko mudiwa…

Aiwa ndakusuwa kukusuwisisa mudiwa wangu!

Shuwa kwaiva kudanana mudiwa…

Kuti zvoga here… nepamwe pataitovana nemhiripiri murima!

Uchimbonditiza kazhinji kumba…nekwaSimbarashe Madziva.

Ukambonditamba nekamukomana kako Francis,

Ukambondidhumhanisa nekamwe kacho Levy,

Ukambonyeperwa nezvangu nana Timmy ‘Gonzo’ Kalio

Kwaiva kukura mudiwa…kwaiva kukura!

Kunyangwe ini, pandakakutamba netwumwe twusikana,

Pandakakutukisa ndikapotsa ndakurovesa naamai vako…

Pandakakuchemera zuva rako rekushanya

Nenyaya yamakaro…

Shuwa sha…a ndakusuwa mudiwa ndakusuwisisa!

Ndinogarorangarira kusvinura, nekutosvorwa kwedu

Kuri kuwedzera hudyi wepachuru

Hunova rudo rwedu

Rwakasungwa neutare, hwatakaita zuva riye

Kubuda nekudoka kwaro zuva

Zvinonditaurira nyaya imwechete inova shanduko

Iyo yandakamirira zuva rauchauya

Apo tichabhadhara pfuma yedu yematoki

Apo tichachata muchato wedu wegore rese

Nekuzvara vana vedu Vladimar, Vivian, Jerome naJanet

Mudiwa ndakusuwa ndakusuwisisa

Dai ndaiva namapapiro

Ndingadai ndakakubvumbamira

Kwazvo kwazvo mudiwa kwauri ikoko

Pachokwa dimudiwa ndakusuwa ndakusuwisisa.

MAGUMO!!!

RAKO SADZA RANDINODA CHIPO

Friday 2 January 2015

Written: 2008 ( Nzarabwe [17] )

Start: 03:24

End:    04:12

RAKO SADZA RANDINODA CHIPO

Dada dada dada ndiwo mafambiro ako,

Daba daba daba ndiwo mafambiro ako,

Kunge uchinge wandiona Chipo!

Kudabaira chaiko,

Kunosiya kwandidambura mwoyo,

Ndiwo ako mafambiro Chipo!

Kutaura kwako kudabudza muromo,

Kana uchinge otaura neni Chipo!

Unozongondiona ndava dabwa dabwa

Kufamba kweakaonda mukomana,

Kuri kushamisika nerunako rwako!

Chipo mudiwa chipo

Chidohodabwairira kuno,

Undibikirewo rangu zimusuwa resadza,

Kwete dabwadabwa randinozvibikira,

Kana usipo mudiwa wangu,

Zvimwe ndinganzwe parere wako mwoyo!

Nyatsodadadza mudiwa wangu,

Undibatsire kudadabvura,

Iyi nyama yawandikangira!

Dadamira kwandiri,

Ndikudetembere nekukudedemurira mudzako nzeve

Kunaka kuri kuita ako machikichori!

Dai ndaigona kutema tsanga,

Ndingadai ndakakupanjikira rukukwe

Ndinyatsosununguka newe,

Sepasichigare pasina masvosve anokanganisa!

Handiti kukudaizvi nekukudaizvi

Kutapirirwa nerudo rwako?

Handiti kukudaizvi rako rokwe,

Handiti kunzwa zvakadai muwangu muviri?

Ndiko kukosha kwerudo rwako mudiwa Chipo!

Nyatsodaiso mudiwa Chipo!

Daima zvako mudiwa Chipo!

Daira zvako mudiwa Chipo!

Chokwadi daka newe handina,

Nokuti rwako rudo runondidakadza Chipo!

Chokwadi ndazochidakanura

Chihwitsi ichi,

Chinehunaku wehuchi,

Dzenyuchi dzamandiriri chaidzo!

Dakanya dakanya

Kudakanyira iwe, ndiri pauri!

Dakara changamire,

Vangova mutamba kamwe,

Kupera kwemuswe wedzvinyu!

Uko kuri kumedzwa nerudo rwako Chipo.

Unongovaziva kuti ndivo vaye,

Vekuviruka nehasha,

Sokunge kuda kudakarika!

Hamheno? ndiwe unoziva

Ako maitiro Mudiwa Chipo!

Ko kugara nedako rimwe kwauyeyi?

Dapura unanzva iri unoda kuenda naro kupi?

Dzikama uteerere ngoma musikana,

Husiku hurefu uhwu!

Makudo zvaakatya akafa mangani?

Daku daku uchiti urikuendepi?

Idya banana mudiwa tiri murudo!

Hauzivi here kuti Dambakurimwa

Ndiye mugarisi waro,

Ivhu rapamusoro nadzo mhuka,

Neshiri dzendudzi dzose!

Kupikisana naye kuzvitsvagira chekugofa!

Ini ndinoti ndazvipira- hamheno iwe?

Iri harisi dambe kwete!

Inga unoziva handisi dambanevana wani!

Dambanudza ako maoko kwandiri,

Ndimadambire newangu moyo,

Une rudo nerufaro runyoro!

Inga mukaka unodananguka mapete wani!

Nderipi ndambudziko,

Risingatitsike tikatadza kurigadzirisa?

Ndevapi vanhu vangataure zvavanoda

Tikatadza kudamwaira?

Ingawani unoziva kuti,

Hosi yashe inoti damwa kune vamwe vakadzi vose,

Kana tichinge tabvumirana!

Ingawani unozviziva,

Hoto kana yorarira,

Inodanaura munhenga senyana.

Ndatitange hupenyu hutsva Chipo!

Hupenyu hutsva husina marumamombe,

Kana matandamhembwe chaiwo!

Asi hupenyu hwakadandamudzika,

Hupenyu hwakadandamuka chaiwo!

Chipo mudiwa Chipo

Haungarapewo here dandabvu,

Iri rawakadai kutarisana naro?

Aiwa Chipo, ndakupa rako gudza

Chasara kufuga kwako kana kuwarira kwako chete!

Ini  ndazvipira kufuridzwa,

Zidanda iri muziso,

Neako maoko anemhiripiri!

Kunge sei zvikazooma,

Kana kuendekasei,

Ndinenge ndinewe pangu parutivi,

Ndichikutenda kubuditsa danda kwawakaita,

Muiwo angu maziso!

Chipo mudiwa Chipo,

Ndinokuda kukunda,

Kana ipi mbumbuchena yakamboda!

Kana vari vamazuva ano,

Handitaure wako mwoyo,

Nemaziso… zvinombotaurawo zvazvinoona!

Chipo mudiwa Chipo,

Rako sadza ndiro randinoda,

Kusvika iro zuva randichavharirwa kuseri kwaro ibwe!

MAGUMO!!!

NDINOKUSUNGISA IWE DHAYARI...

Friday 2 January 2015

Written: 2008 ( Nzarabwe [19] )

Start: 02:37

End:    04:12

NDINOKUSUNGISA IWE DHAYARI…

Nan’ana nan’ana kunditarisa haunyare,

Iwe bhuku nhema rine zvitema?

Vhai vhai kundibuditsira karurimi kachena,

Uchiti uri kusvotesa ani?

Anofanira kunyara pakati pedu ndiani?

Ini ndinonyora zvisingaitike,

Newe unorera zvitema zvoga-zvoga,

Pasina kana chimwechete chinomboitika?

Kusvipa uku ukati,

Hausi wakaita rasha,

Kupiswa nemoto wasatani nenyaya dzekunyepa?

Kunyepedzera kusunga chitorobho chitsvuku,

Hanzi ndiri murume pavarume!

Uri rasha iwe- kusvipa kudai rasha chairo iwe!

Haungambotadze kuita rasha iwe,

Nemanyepo aunogara wakaputira murako dumbu,

Rechitafutanana cherume,

Sechiya chakadyiwa  gumbo rose,

Chichishinyira chakangobuditsa ziso rapakona,

Boi- boi netwurute rembu rembu!

Zvawaibhadhanura ako makumbo,

Payangu tafura wakasekerera,

Wakazvishongedza, waiti ndidini?

Ndidini? Ndaitoti ndidonhedzere muto,

Pakati peako makumbo musikana!

Ndaigozviitawosei ndaitoti ndimanyore,

Ose mashizha ewako muti waunovhaira nawo!

Zvawazvimbirwa kuti zvi zvi zvi kudai

Waunoda kunetsa ndiyani zvino?

Fufutirwa wega musikana fufutirwa!

Zvaunonditarisa neziso rapakona,

Uchindityisidzira nerako dema ganda,

Unoti ndinozvibuditsa sei?

Iro rako dumbu ratodzika midzi,

Nezvangu izvi zvisikwa izvi,

Zvinova churu chaicho kukura?

Hapana chekuita vasikana,

Enyu mashizha azara nezvangu zvinyorwa.

Hapana- Chokwadi hapana maitiro andinoita!

Saka chitosekererai- sekererai henyu vasikana!

Ko rudo runoputswa nezuva rimwe here,

Kana kuti rinovakwa nezuva rimwe?

Ko zvandaichibata chipfuva chako,

Neangu maoko ndichiteuka dikita,

Handiti kwaiva kwedu kufara?

Ndakatarisa zuva ratakasangana neyangu tsvarakadenga,

Handiti kwaiva kwedu kufara- chaipa chii ipapo?

Waisatsvodana nemuromo wemashoko angu here,

Pese pandaigumbura zvigutswa?

Waisatsvodana nemuromo wemashoko angu here,

Pese pandaipembera nemufaro?

Waisatsvodana nemuromo wemashoko angu here,

Pese pandaiita hurongwa hwangu?

Waisatsvodana nemuromo wemashoko angu here,

Pese pawaindiyeuchidza zvangu zvirongwa?

Saka Taidanana! Taidanana musikana.

Chaunoda kundirambira ipapo chii?

Chii chaunofutisira ako matema matama?

Chii chaunofutisira kwako kutema kumeso?

Chii chaunofutisira- futisira dzako dzitema mhino?

Chii chaunonditarisira nerako dema ziso?

Wakafutisa kako kadumbu kudai,

Unoti uchadiwawo nani hake,

Ane tsiye nyoro garwe kuhotsira nhunzi!

Handichatokude- handiti wakati unoda kundisungisa!

Zvino tiri kuda kuona achasungwa wacho!

Sungwa une mhosva iwe!

Ndiyani wawaiti wakaponda musi watwendi?

Pfimbi yaunoti unayo nasekuru Mbudzi ndeyeyi?

Ndiyani wawaisainisa apa neapo,

Saka zviri pachena waiva naye!

Taura kuti nemunhu uyu munozivirana kupi?

Sei usina kuenda kubasa,

Zuva iri sekunyora kwawakaita?

Ko izvi zvawakanyora apa,

Hazvisirizvo zvawakataura pamusangano here?

Ko izvi zviri apa,

Hazvisirizvo zvawakaita masvondo maviri akapfuura?

Haisi riyo here mhuri yako,

Yakazvarwa mazuva aya?

Saka chaunoti handisirini chii?

Ko ihohu uhu hausi here hurongwa hwako,

Hwaguhwa napakati chaipo,

Segwendo gweGweru gwagugwa negugwe?

Saka sungwa iwe une mhosva!

Ndizvo zvinokupa kutarisa vamwe,

Neziso dema muvir uri tsubvu kusviba!

A-aah a-aah unondinongedzeraa nekako kagunwe,

Katsvuku kakazara neropa revanhu,

Unoti ndichavhunduka?

Handityisidzirwe nemvere dzeshumba ini!

Ndiwe wakamukomera pamuchinjikwa iwe!

A-aah asi Banda akamuka chipoko,

Ko ‘Ini huku mutorwa’

Makazonge mamuvhuna mutsipa rinhi?
Kubva ndiwe mhondi huru,

Zvino kunongedzera vamwe kwabva kupi?

Zvinongedzere  iwe zvese nemuwiri,

Wako mutema mesemuri vaviri!

Hachinyare chibhuku chitema,

Chakazvarwa nezvitema!

Anondisunga wacho ndiyani,

Uye achindisungirei?

Anenge andibvunza mhosva achitii?

Kurikunzi andibvunza handiti ndinongokutarisa…

Tione ukatiza, tione ukamera mapapiro

Kana idzo nyanga chaidzo!

Tione ukandituka…zvikashaya basa!

Ndinongoramba ini,

Tione vakandinyoresa zvakanyorwa,

Muicho chako chidumbu chichena chisere zvitema:

Kana vakandibvunza hukama,

Ndinongokuramba pakazara vose vanhu,

Twese twana twukakutsvororodza!

Sungwa iwe sungwa,

Bhuku dema rakazara zvitema!

Chokwadi ndachishaya chaunonditarisira,

Neako maziso matema evanhu vakafa chaiwo,

Iwe uriwe wakaberekeswa humhondi kumusana.

Kuri kunzi kusungwa handiti ndiwe unosungwa?

Kupusa kwegarikuni vakomana…kushaishira marinodyira!

Unenge uchiti uri kufadza ani manje,

Handiti kuzvitsvagira hutuputu rebasa?

Unofanira kunyara iwe kwete kundityisidzira,

Nokuti ndiwe wakatakura zvose zvitema muako mashizha!

Kuramba kwako mhosva hakuna kusiyana,

Nekuona Chidhumo achiramba kuti handizive Masendeke!

Saka sungwa iwe- sungwa.

Dai usipo ndingadai ndisinganyepewo

Dai usipo ndingadai ndisina kuponda munhu musi watwendi

Dai usipo ndingadai ndisina kurangana nasekuru Mbudzi

Dai usipo ndingadai ndisina kusaina ayo mapepa efufuro

Dai usipo chokwadi zvirongwa zvangu,

Zvingadai zvisina kuputsika.

Mharapatsetsetse ndiwe- Mupunzahupenyu ndiwe,

Shamwarinhema ndiwe- Munyengedzi chaiye ndiwe!

Ndosaka ndakuramba pakazara vanhu,

Kana wakaguta unofarisa handiti?

Rega tione kana pakawana achakudawo,

Iwe wakadai kutungamidza kadumbu kumberi,

Wongopfira-pfira pasina chiri kusemesa…

Chokwadi ukaramba wakanditarisa kudaro,

Ndinokusungisa iwe dhayari,

Ukada kuita zvekutamba neni!

MAGUMO!!!