Thursday 5
February 2015
Written By: VaChikepe: The Poet
Collection: Gutabwe [5]
DHENDE RENYU: MATEHWE ANGU
Zvakanyorwa-
tikazviverenga
Tikadzima…tikanyora
zvedu tega
Zvatakaverenga
nekuvandurudza!
Isu hatifambe
zvechimombemombe…
Asi tinonzvera
raramo…!
Hakuna sango
ratinotya
Hatina sango
ratinozesa
Hatina sango
risina sango
Zvesango izvi
ndozvedu chaizvo
Tichipindira
takachonjomara
Takabata miseve
Tichiroverera
kajaivhi
Izvi!
Matehwe mudenga
Takurai matende
munonge mari
Khumalo,
mundevere
Hazvisirizvo here
zvidhende zvekwenyu izvi?
“Hooo izvi…matehwe
edu aya
Totomagarira
nekutomararira aya
Tatokanganwa kuti
takambodya nyama
Ndopatinozoti….a
komatehwe aripi
Ndifuge gudza
rangu iri zvakanaka!
Ndoamunochema
nawo aya?
Ndizvo
zvinokushungurudza izvi?
Haisi nyaya
kwatiri isu”
Vanodaro mambo
ava…
Madhende aya…
Madhende aya!
Pakadaro- unonzwa
sei
Pawasvika papapi
manje?
Uri pazasi
pakadzika sei
Hausi kuwira pasi
here
Pane panokwanisa
Ku
Ku
Ga
Mha here?
Munenge muri
mupoto ipapo
Uri mukati madzo
pfungwa
Chakachaya
panzwisiso
Hondo yakabaka
Icho
chakatochaya!
Murarami achiti
ndinobuda chete
Muteyi achiti
tsika uone
Gumbo ndakateya
kare!
Munhu achimhanya
nehupenyu hwake…
Ndopaunovanzwa
zvakare vachiti
“A….aya, ndomatehwe edu manje…
Totofamba takamapfeka aya
Tosweara nawo awa…
Totamba nawo aya!
Ndoraunochemera dehwe?
Isu tinamahwe….
Akawanda…ndeedu
aya!
Matehwe tinawo
ari patiri
Asi isusu hatisi
pamatehwe!
Pakadai…
Ndipo unonzwa
pfungwa dzichidzoka
Zvinyoronyoro
dzichifefetera
Pakadai twundebvu
unotwudhonza
Kana pahuma apa…
Unopapuruzira
Vaviri kana
katatu
Inenge iri mhepo
iyoyo
Inenge iri mhepo
inenge
Ichifamba ipapo
Kuti vai vai
Nepauri chaipo
Mheni ichinzi
Irinechekoko
Mabhanangana
Achitinhira
Munhu
Achimhanya!
Kuri kufunga
kwemunhu ikoko…pfungwa dzichigaya
Chigayo
chaicho….wakambosvika pachigayo chepfungwa
Wakambopatsvika
here…ndipo unofanira kupanzwisisa ipapo
Shamwari
pachigayo chepfungwa hapana kumira mushe
Kupatauraso
unonzwa hana kutanga kurova
Zvekuti kana
dzimwe pfungwa dzako dzinokuudza
Kuti
heyi…haaaa…zvatanga manje!
Pachigayo chepfungwa
shamwari
Munhu anofanira
kuuya akasimba
Nokuti haaa
unotyokera,
Wakambotyokera
mupfungwa?
Avo vakatyokera
mupfungwa
Tinoti
pora…vadzidzise!
Ndipo pachigayo
chepfungwa ipapo
Ndipo panouyiwa
nevakasimba papfungwa ipapo
Ndipo munhu
unenge uri
Nhabvu yepfungwa
ichitambwa ipapo!
Asi pakadai isu
vanaTembo hativhunduke
Tinosvika
takasununguka
Takanyemwerera
Tichimwaza
chiedza
Vachiita huturu
Isu tichitova
nerudo…
Vachida
kubiridzira
Isu todzidzisa
Vachida kuita
hutsinye
Isu tobuditsa
humhuka
Vachida kungwara
isu tongwadza
Vachida
kuchema-chema
Isu tonyararadza
Vachizevedzera
Isu tovarwira
Nhasi
Ndazoziva kuti
Ndirimunhumutema!
Munhumutema
akanaka
Munhumutema asina
zvitema
Munhumutema
akazara nerudo
Munhumutema
anokwanisa kugara murima
Muchena akapfuurira
asina kumuona!
Izvo zvakatadzwa
nemuchena kunyangwe
Akazvizora madota
mwiri wese…
Apa here apa?
Anenge achitopatya apa…
Hapangogarwe zvekufarafaraka apa…
Pahumamboka apa,
Chigaro chamambo ndechamambo!
Ukaona waitwa mambo, ngatikuzive nerudo!
Ndazopaona
apa…ndazopaona!
Saka mati dhende
ravo matehwe enyu?
Hongu-muzukuru!
Usatyiswe
nenzondora
Yenhiyo…inotswanya
Svosve kunyangwe
Achiri mudumbu!
Isu tiri vanhu
vatema
Takasikirwa
kutonga
Dai waimaziva
makare
Ungadai
uchipetuka
Nekufara kuti
petu chaiko!
Makareko tisu
taitonga isu!
Dzedu pfungwa
dzaiva mberi
Kumberi mberi…
Dzakadzama
dzakadzika
Kuti dzidzidzi!
Izvo here izvo
Hataitarisa isu
Aiva matehwe ayo
Aiva madhende ayo
Ndiko kudzama
kwakaita pfungwa dzako ikoko!
Hutongi uhwu…
Isu tiri vatongi!
Mumwe akagarira
rake dhende
Mumwe dzake
nhembe akapfeka
Mumwe rake bindu
remanhanga anaro
Mumwe tsuro dzake
dzose anadzo
Mumwe mombe
hadzizivane pake pamusha
Mumwe akavakira
imba yake pandarama
Zvipo izvi…ndihwo
hutongo hwedu uhwu
Ane chake simudza
mudenga…utende Mwari
Ndihwo hutongi
hwedu ihwohwo…
Ndiro simba redu
iroro!
Wako moto
pfuchidzira
Wako mwoyo
kuchidzira moto
Rudo nesimba
ngazviyerere
Kubva pachigaro
chehushe hwakwo
“Rive ramangwana
rine huchena- hwakacheneswa”
Ndidzo ndimi
dzedu dzekusowe idzi…
Kwedu kusowe,
kunorira ndimi dzekumakomo!
Kwedu kusowe
ndiko takaziva tisati tauya panyika
Ndiko kwaiva
kunyika kwedu tisati tauya pano pasi
Hutsvene
hwemusiki hwakasumudzwa mudenga menzwisiso…
Muregei munyori
wanhasi uyu….arikunyora kuti
“Munhu ane hupenyu
hutatu”
Ini ndinototi
tine hupenyu hutatu
Ine humwe hupenyu hwakawanda pakati!
Saka munhu akasikirwa kurarama…ngaararame!
Chinoraramisa…hupenyu hupenyu!
MAGUMO!!!
No comments:
Post a Comment