SEKURU VANGU VACHIPUNZA

Wednesday 22 October, 2014

Written on the 2^nd of March 2014

Sekuru Vangu VaChipunza

Nhai sekuru maita sei?

Maitaseiko chakuradzikai nemusana?

Maitaseiko zvatakushayai…

Pagungano romufaro kudai?

Maitaseiko mabatisa…

Vazhinji matama mumaoko?

Maitaseiko nhai sekuru…

Maitaseiko nhai asekuru!

Ko mashayi zvamakadzinga kare wani!

Ko mashayi zvatakadzinga kare wani!

Chazova chii, ichi nhai futi?

Chine kumeso kwakashama segoni…

Chisinganyare kufamba chisina shashiko,

Chisinganyare kubvarurira mhapa paruzhinji!

Zvakadai izvi tinopisa nemwoto!

Mwoto weMweya Mutsvene tinoshevedzera!

Mwoto weMweya Mutsvene tinoburutsa!

Mwoto weMweya Mutsvene- tinosvipisa izvi…

Zvine tsika dzinamanyemwe semakumbo ezongororo!

Nezita raMambo Jesu tichifamba mumakomborero…

Tichipinda mune mamwe makomborero makuru!

Ngirozi dzichiombera maoko

Mudzimu unoera uchitigonesa

Samasimba vachinyemwerera…

Zvavo vakagara pachigaro chiTsvene!

Aiwa chisimukai henyu sekuru…

Aiwa chisimukai henyu asekuru…

Vedu vezvomweya!

Mufudzi wemweya yedu…

Muriritiri weshungu dzedu!

Muponesi wemarwadzo edu

Munun’una waIshe wedu Jesu Christu chaiye!

Aiwa chisimukai henyu sekuru…

Aiwa chisimukai henyu asekuru…

Mbiri nerukudzo zvirambe zvichipihwa kuMusiki

Kuburikidza  nechipo chehupenyu hwenyu uhwu

Kuburikidza nerufaro rwenyu urwu…

Kudzamara kuve nekusingaperi peri…!

Amen!!!                                                                                              

By VaChikepe: The Poet

seremumu@gmail.com

(+263) 0772 488 777

@Publishar

Publisher T.P Chikepe

(Reporting from Katanga Norton, Zimbabwe-Africa)